ఐసోలేషన్ తెచ్చిన కంగారు.. భవనం మీద నుంచి దూకి వ్యక్తి మృతి

హర్యానాలో ఓ వ్యక్తి కరోనా ఐసోలేషన్ వార్డులో చేర్చగానే కంగారు పడిపోయి ప్రాణాల మీదకు తెచ్చుకున్నాడు. పానిపట్ జిల్లా నూర్‌పూర్ గ్రామానికి చెందిన శివచరణ్ నూపుర్ (55)ను అస్వస్థత కారణంగా కర్నాల్‌లోని కల్పనా చావ్లా మెడికల్ కాలేజ్ హాస్పిటల్‌లో చేర్పించారు. అతనిలో ఫ్లూజ్వరం లక్షణాలు కనిపించేసరికి వైద్యులు ఐసోలేషన్‌కు తరలించారు. దాంతో కంగారు పడిన ఆ వ్యక్తి ఆస్పత్రి నుంచి పారిపోయేందుకు సిద్ధమయ్యాడు. దుప్పట్లు కలిపి కట్టి వాటి సహాయంతో ఆస్పత్రి భవనం నుంచి కిందకు దిగేందుకు ప్రయత్నించాడు. కానీ మధ్యలోనే దుప్పట్ల ముడి ఊడిపోవడంతో ఒక్కసారిగా నేలమీదకు పడిపోయి అక్కడికక్కడే ప్రాణాలు విడిచాడు. ఆ తర్వాత కొన్ని గంటలకే ఆయనకు జరిపిన కరోనా ఫలితాలు నెగెటివ్ వచ్చాయి.